تحدى جديد- 365 مقال في النجاح

 التحدى بالنسبة لى مش موجود في الخريطة ، اللى بحبه بيكون نفسى أعمله

لكن عشان مكسلش كتير

أنا هبدأ تحدى مع نفسى

هو أني هكتب 365 مقال في النجاح و التحفيز

من خلال الأستعانة بكتاب 

365 مقولة في النجاح

للكاتب رءوف شبايك

الفكرة أنى حاسة أنى عندى كلام كتير عايزة أحكيه ، و أعلمه لغيرى، لكن مكنتش عارفة منين أنطلق؟؟

فقررت أنى هكتب مقولة كل يوم من الكتاب ، و هشرحها بوجهة نظر مختلفة و بمعلومات موثقة (المعلومات هى كل ما حصلت عليه في حياتى و أدركت صحته)

و أن شاء الله أنجز المقالات بأسرع وقت ممكن

و هبدأ اليوم الى أن يشاء الله

توكلنا على الله

Shaymaa Alokaily

أنا جاية من المستقبل و بقولكم-عايز لما تكبر تطلع أيه يا حبيبي؟؟

أنا جاية من المستقبل و بقولكم

عايز لما تكبر، تطلع أيه يا حبيبي؟؟

شوف الفيديو دي

https://www.youtube.com/watch?v=kzt7NHWElfI

سؤال خلي الدنيا عايشة في حالة غباء تام

تعالوا نفصفص الامر مع بعض

عايزأيه؟؟

غالبا الكلمة دي لما بنسمعها من حد اكبر منا و أحنا صغيرين ، بتبقي انك لازم تعمل اللي هو عايزه، لأنك دايما في نظر الناس اللي اكبر منك مش فاهمة حاجة ، عيل خايب مشعارف حاجة في الدنيا، و مشعارف مصلحتك؟

يعني مثلا لو حد سألك انت عايز تبقي أيه لما تكبر، غالبا لو قلت كاتب، باباك و ماماتك هبصوا عليك بنظرة شذر، أزاي ميقولش دكتور ولا مهندس؟؟

لو قلت عايز أبقى صاحب محل جزم ، غالبا هتنضرب بالجزمة 

:)

لو سمعت الفيديو اللى فوق، هتلاقى بمقاييسنا الحالية طفل لا يتجاوز عمره 13 سنة موجود في 

TDEX

اللى ناس كبيرة تخطى عمرها 35 سنة تحلم أنها تكون في 

TEDX

هتلاقى طفل بمقاييسنا ، وقف للحظة و سأل نفسه ، و أنا ليه لازم أستنى لما أكبر؟ عشان أكون اللى نفسى فيه ؟، ليه لازم اضيع 20 سنة من عمرى دراسة و محاولات عشان أوصل للى عايزه؟ ، ليه ميكونش فيه طريق مختلف، ليه مصريين نضيع عمرنا في التزام بتعليم لا يعطى الحد الأمثل لاولادنا من المهارات اللى لازم يتقنوها في حياتهم

مين قال أن لازم الطفل يقعد 20 سنة في المدرسة و الكلية ، مين عمل تحديث للمناهج؟؟ ، الأصل أننا نعرف أيه هي المهارات اللى لازم الطفل يتقنها ، و لازم يكون عارف الأساسيات و ينطلق، و مع كل واقعة و أنطلاقة جديدة و مع صعوبتها هيكون فيه أتقان و أبداع

ضيعنا كتير من عمرنا في صناديق و توابيت ، و النتيجة أنك بتبدأ تعرف أنت عايز أيه بعد سن 30 أو 40 ، طيب و الباقى من عمرك أخباره أيه؟؟

ربنا لم يخلقنا عبثا (حاشا لله) ، و ربنا سبحانه و تعالى أقر قوانيين للكون ، و علينا الالتزام بها و الأبداع من خلالها

ما أقره البشر من قوانيين قابل للتعديل

قانون البشر ب 20 سنة دراسة غير عادل، ما أقره البشر بتثبيت مناهج معينة عشان الطفل يدرسها و هو ممكن ميكونش بيحبها، مأساة بكل المعايير

و عايز لما تكبر تتطلع أيه يا حبيبى؟؟!!!

Shaymaa Alokaily

الأحباط و الكتابة و المعايير

 الأحباط و الكتابة

ساعات الشخص بيجيله أحباط شديد لما يلاقي نفسه ملزم بقوانيين و بأمور مختلفة و معقدة و كتير جدا

يعنى لو أنا عايزة أكتب شئ، لازم أفكر فيه ، و أجمع كل المعلومات عنه ، و تجميع المعلومات يشمل المتاح و غير المتاح عشان أحس ان المثالية واخدة حقها، وأكتبها و أرجعه لغويا جامد ، و بعدين لما أنشرها لازم يكون فيه صورة ، و لازم يتم جذب الأنتباه بشكل ما ، و يكون المحتوى مختلف، و يكون و يكون و يكون .... ألخ ، وياريت نضع خط كبير و متعدد تحت كل المواصفات المطلوبة اللى ناس وضعتها و أحنا ألزمنا بها نفسنا على الفاضى و المليان

الأمر أبسط من ذلك بكثير، يعنى لازم أعرف أنا بكتب لمين ، و هكتب أزاي ، و هل يلزمنى كل هذه المواصفات و لا يكفينى حد معين

لما بنروح نشترى سيارة من التوكيل بيكون عندنا مستوى من السيارات تسمي

Standard

و فيه

Advanced

 

 و دي معناها أن فيها أمكانيات معينة مطلوبة كحد أدنى في السيارة ، و كل ما تحب تضيف شئ زيادة ، هيتم أعتباره بسعر مختلف أزيد من السعر الرسمى للسيارات 

Standard

أنا هنا بكتب عشان نفسى ، و لو حد عدى المدونة ، يقدر يفهم اللى فيها ، و لو فيه أستفادة من المعلومات

المعايير اللى عندى ، الحد المعقول من التصحيح اللغوى ، تقريبا المعلومات اللى بحثت عنها كلها و اللى قدرت أوصل لها فى توقيت بحثى

مش لازم صور جذابة ، مش لازم الكمال

أكتب مثلما أحب ، لا كما يريد منى السوق

دى رؤيتى عند كتابة هذه المدونة

Shaymaa Alokaily