Priceless، بلا ثمن - الحلقة رقم 4

Passion

بالعربي

الشغف

الحلقة رقم 4

Priceless، بلا ثمن

في ثقافتنا، أتعودنا أن كلمة بلا ثمن بتتطلق علي شئ يا أما غالي قووي لدرجة أنه صعب تتمنه، أو أنك لو قدرت تاخد الشئ بأقل سعر أو ببلاش أيه المشكلة؟؟!!

و ناس كتير شاطرة في ثقافة الفصال، من باب أنها مش عايزة حد يخدعها، و دي حقها، الفكرة مش في الفصال الفكرة، أننا أصبحنا نعشق أننا ناخد الشئ ببلاش، واتعودنا، أننا لازم نكسب و لو قدرنا نمسك العصا من النص عشان نحصل كل شئ في الدنيا، هيبقي أروع شئ، لكن الحقيقة أن دي مش موجود ، و مش حقيقي في حياتنا، كل تصرف و كل قرار هتشيل تبعاته، و كل حاجة و ليها تمن.

مفيش شئ بدون تمن، المشكلة أننا قيمنا التمن بالفلوس، لكن الحقيقة فيه أثمان مختلفة، بندفعها بدون شعور منا ، و مش لازم الثمن يكون فلوس، ممكن تكون صحة، مجهود، وقت، أنتظار، مشاعر خيبة و ألم .

حتى لو هتاخد دوره مجانية، انت بتدفع وقتك ، وبتعمل دعاية لصاحبها ، وكمان افكاره ، بتكون جزء من شخصيتك وعقليتك و طريقة تصرفك.

حتي الأكلة، لو أكلت حبة بلح، التمن أنت دفعته عشان تشتريها، و جسمك هيتأثر به، حتي لو لم تلاحظ هذا التأثر، لو كانت لا قدر الله مسمومة ، و سمها بسيط، سري في جسدك، و لو كانت كويسة و من النوع الجيد، لحمه (البلحة نفسها أقصد) تحول في جسدك ليستفيد منها، استفاد منه الدم و العروق و هكذا.

عايز تبدأ تبحث عن شغفك ، و تتطور حياتك، و تغيير مستوي معيشتك، يبقي لازم تتدفع التمن من وقتك "،  أنك تستقطع وقت تقعد تعيد ترتيب حساباتك،  و تفكر في حياتك و تبدأ تنظم كل ما يساعدك علي الحصول علي شغفك و علي حياة أفضل ليك و لأهلك و لمجتمعك"

لو بدءت تمارس شغفك، يبقي لازم تتدفع من مجهودك و محاولتك كتم غيظك من الناس اللي بتعايرك بالتفاهة عشان بتسعي ورا شغفك، لو شفت فرصة لشغل أفضل علي المدي البعيد، يبقي لازم تتدفع تمن الأنتظار و تمن معايرة الناس ليك، لو حاولت تربي عيالك بأسلوب أفضل مختلف عن ما يمليه عليك المجتمع، يبقي لازم تتحمل ما يظهر لك من قسوة و محاولة لجرحك مستمرة.

فكرت تبطل تسعي ورا شغفك، يبقي لازم تتدفع تمن كده من أحساسك انك مش في مجالك، و أن ليه في ناس أميز مني في المجال دي؟، و ليه مش قادر أوصل للأفضل؟، و حتي لو وصلت، حاسس أني مش في مكاني، و دي كله خوفا من الناس أو من المجازفة.

افتكر موقف كنت مفكر انك مش هتدفع تمن فيه ، ودفعته؟ و كان شكله أيه التمن دي؟؟!!

-----------------------------------------------------------------------------------------

------------------------------------------------------------------------------------------

-----------------------------------------------------------------------------------------

-----------------------------------------------------------------------------------------

-----------------------------------------------------------------------------------------

Shaymaa Al-Okaily

الأجابة النموذجية-الحلقة رقم 3

Passion

بالعربي

الشغف

الحلقة رقم 3

الأجابة النموذجية

مفيش شئ أسمه في الكون أجابة نموذجية أو مثال محلول ، فيه شرح فقط لطريق، و توضيح لأهم المعالم الخاصة بالطريق، يمكن اللي اخترع الأجابة النموذجية و المثال المحلول، كان شخص نيته حسنة ، أنه يشرحلنا طريق معين عشان نفهم، لكن الناس أخدته شئ مسلم به ، و أساسيات، لدرجة أن فيه ناس أعرفهم كتير، مستحيل يصدقوا إن المثال المحلول و الاجابة النموذجية ممكن يطلعوا غلط.

يمكن تكون و أكون أنا كمان شخص من الناس دي، لكن دي الحقيقة، اللي لازم نفهمها، أن مفيش حاجة أسمها إجابة نموذجية، أو مثال محلول، ممكن يكونوا موجودين علي سبيل أنه يرشدوا الطريق زي الدليل اللي بيساعدنا في الصحراء، لكن وارد يكونوا غلط.

كل سؤال او تدريب هتلاقيه في البوستات حله بجدية، و حاول مهما اعتقدت جوا نفسك ان اجاباتك ممكن تكون غلط ، او أن فيه اجابة أنا أقصدها، أنسي اللي ممكن أنا أقصده ، حاول أنت و فكر بعقلك أنت. 

متوقفش عقلك عشان شخص ، و لا عشان حل نموذجي ، و لا عشان اجابة صحيحة نهائية، لأنهم شئ مش موجود، عقلك ربنا خلقه عشان يفكر، و يحاول، و يفهم و يفلتر الصح من الغلط، و يفضل يحاول مهما حصل. 

امحي من عقلك شئ اسمه الاجابة النموذجية ، مفيش فى الحياة ، و لا الكون كله اجابة نموذجية / او مثال محلول،  لو أرد الله أن يخلق لنا اجابة النموذجية ، لكان التغيير و التطوير و الأختلاف مش من سنن الكون. و لا أيه رأيك؟؟ ( أكتب أجابتك في الأجندة بتاعتك)

---------------------------------------------------------------------------------------

كل ما عليك هو انك تحاول تعرف الطريق ، وعندك وعى،  وادراك كافى علشان تكمل الطريق، والرحلة هتظهر في البوستات و في الكتاب أن شاء الله لما يتنشر كمان ، والحقيقة مفيش برده حاجة اسمها اجابة صحيحة واجابة خاطئة100%،  ولا قرار صواب 100% ولا قرار خاطئ 100 %.

فيه قرار هتقدر تشيل تبعاته وقرار مش هتقدر تشيل تبعاته، لازم تفهم أن لكل شئ تبعات، كل ما عليك أنك تقرر مع نفسك،  هقدر أشيل تبعات قراري و لا لأ؟؟!!، و عمرك ما هتعرف الطريق صح و لا غلط ، غير لما تجرب، لو جربت و طلع غلط ، هتستفيد ، و تتعلم من التجربة ، و مش هتمشي فيه تاني ، و هتقدر لو ظهرلك العلامات اللي شفتها في الطريق دي مرة تانية، تحدد طريقك الجديد ، هل هوصح و لا غلط من البداية!! ، و هتفيد غيرك و مش هيضيعوا وقت من وقتهم.

افتكر قرار أخدته / نفسك تأخده ، واكتب تبعاته اللي متوقعها!!

-------------------------------------------------------------------------------------------

------------------------------------------------------------------------------------------- 

-------------------------------------------------------------------------------------------
-------------------------------------------------------------------------------------------

-------------------------------------------------------------------------------------------

-------------------------------------------------------------------------------------------

------------------------------------------------------------------------------------------- 

Shaymaa Al-Okaily  

الحلقة رقم 2-الشغف

Passion

بالعربى

الشغف

الحلقة رقم 2

قبل ما ننتقل لمعرفة أي شئ عن الشغف اللي اصبح موضة، كلمة الكل عمال يردد فيها، ويقول لك لازم يكون عندك شغف  passion، وناس كتير اصبحت تضيفها فى كلامها ، ومدربين ان عاجلا او اجلا هيظهروا ، و يتكلموا عن الشغف، و ناس بتشتغل في coaching و التدريب علي الشغف وأكتشافه

وده كله شئ كويس انك تلاقى فى المجال ده بدل الدليل الوحيد (المرشد فى الرحلة) هتلاقى 10 مرشدين للطريق، وبدل الطريق الواحد هتلاقى ملايين الطرق،  ولكل مرشد/ دليل ولكل طريق مميزاته وعيوبه، أهم شئ تعرف تمشي في الطريق وتستمتع به " هتسمع كلمة تسمتع دي كتير" في طريقك و أنت عايش الشغف.

بس قبل ما تروح لازم تفهم الاساسيات لرحلتك عشان لما تتدور على مرشد تلاقى حد مناسب،  ولما تلاقى طريق تقدر تقيمه بشكل جيد قدرالامكان، مش تروح تركب مع مرشد وتاخد عربية ليموزين وتمشى فى طريق فى الصحراء، وانت فقط ممكن تكون محتاج تمارس شغفك من الغرفة اللى جنبك و أنت معاك ورقة وقلم بس.

قبل الرحلة لازم يكون هناك توضيح لبعض النقاط المهمة، عشان تعرف تشوف حياتك و طريقك اللي كله ضباب بشكل كويس، أو على الأقل بمعدل رؤية مناسبة، و متزعلش من أي خطأ ممكن يحصل في الطريق، لأنه طريق و وارد كل شئ فيه ، حتي قطاع الطريق وارد وجودهم عليهم، فلازم نتعلم أننا نفهم طريقنا قدر الأمكان.

من الأفضل يكون معاكم أجندة معاك و قلم في رحلتنا عشان تكتبوا و تتدونوا ملاحظاتكم و أجابات الاسئلة و التمرينات

الشغف هيتم شرحه بشكل أكتر تفصيلا في البوستات الجاية، الأهم خلى بالك من النقاط الجاية في البوستات،،،،،،،،،،،،

ومن هنا نبدا نقول بسم الله نبدا رحلتنا سوا،،،،،،،،،،،،،،

أول نقطة

الأجابة النموذجية

 

  Shaymaa Al-Okaily