أنا جاية من المستقبل و بكلمكم عن الفشل- الجزء التاني

أنا جاية من المستقبل و بقولكم عن

الفشل

الجزء التاني

قلت في الجزء الأول، اني بحثت عن كلمة فشل في الأحاديث النبوية ، و لم أجد ، و ممكن يكون فيه لكني لم أعثر علي شئ ، لكن وجدت حديث يتكلم عن العجز

عن أبي هريرة رضي الله عنه أن النبي صلى الله عليه وسلم قال : ( الْمُؤْمِنُ الْقَوِيُّ خَيْرٌ وَأَحَبُّ إِلَى اللَّهِ مِنْ الْمُؤْمِنِ الضَّعِيفِ ، وَفِي كُلٍّ خَيْرٌ ، احْرِصْ عَلَى مَا يَنْفَعُكَ ، وَاسْتَعِنْ بِاللَّهِ وَلَا تَعْجَزْ ، وَإِنْ أَصَابَكَ شَيْءٌ فَلَا تَقُلْ لَوْ أَنِّي فَعَلْتُ كَانَ كَذَا وَكَذَا وَلَكِنْ قُلْ قَدَرُ اللَّهِ وَمَا شَاءَ فَعَلَ فَإِنَّ لَوْ تَفْتَحُ عَمَلَ الشَّيْطَانِ ) . رواه مسلم ( 2664 )

أستعن بالله و لا تعجز

خليني أشرحها ليك من وجهة نظري ، لو عندنا حلم عايزين نحققه ، بنعمل خطة و نسميها 

خطة A

 و بعدين بيكون عندنا خطة احتياطي

و بعدين لما تفشل الخطة الاولي ، نروح للخطة التانية ، و لو فشلت التانية نقوم هوب، ضاربين كرسي في الكلوب، و نغير الحلم

الحلم دي مش شئ للتغيير، شئ بتاعك تغيره ليه??، الأصل ان كل هدف هيوصلك لحلمك،لازم  تعمله خطة تنفيذ ، و خطط احتياطي متعددة
و الهدف اللي تلاقيه بعيد عن حلمك، قيمه قبل ما تمشي فيه

الحلم هو عبارة عن عدة اهداف مختلفة في نظر غيرك بعيدة و لا يصل إليها أحد، و في نظرك بالمجهود وارد تتحقق ، و أكيد هتم بفضل الله و قوته، ثم بقدرتك علي التزام الأسباب المساعدة علي الوصول

أستعن بالله و لا تعجز

بمعني كل جزء لمسك فيها و حرك جواك القوي علي المحاولة مهما كانت التكلفة

Shaymaa Al-okaily

أنا جاية من المستقبل و بقولكم عن التوابيت

 

أنا جاية من المستقبل و بقولكم عن

التوابيت

التوابيت معروف أنها أماكن بيتم وضع الموتي فيها ، طيب ليه أنت مصر تعيش فيها؟؟

لما هي حاجات للأموات ليه و أنت عايش علي قيد الحياة مصر تعيش في تابوت مش مقاسك و مش بتاعك و لا يخصك؟؟

ليه بتنبي التابوت دي و أنت في قمة السعادة ، من خصائص التابوت أنه محدد الشكل جدا ، و مش بيتحرك ، يا أما ناس تحركه ، يا أما يتحرك ذاتيا أذا كان علي مكان عالي و يسقط علي الأرض يتكسر مليون قطعة

كلام غريب عليك ، صح ، مشعارف أنا بتكلم عن أيه؟؟ ، بتكلم عن اصرارك أنك تكون زي الناس اللي حواليك و أنت مش شبهم ، و رفضك لأي فرصة تغيير ممكن تحصل ، لأن الفكرة هتخليك شاذ عن الجماعة اللي حواليك ، و احنا كلنا بنبحث عن الرضا الجماعي من مجموعتنا ، فبنعمل المستحيل عشان كده

ليه مصر لما تجيب موضة من بره ، تاخدها زي ما هي بدون فلتر، و بدون ما تسأل نفسك ، هل تنفع لي و لا لأ؟؟ ، هل هي من ضمن ما أباح الدين و لا لأ؟؟

ليه مصر تطلع دكتور رغم انك بتكره التشريح ، و ليه مصر تتطلع فنان ديكور أو مصمم أزياء رغم انك مش بتفهم أصلا في الألوان ، و دي كله عشان ابوك او امك او حد من الجيران او تقليد اعمي بلا وعي

أيوة كل شئ محدد يتم ممارسته بلا وعي و لا تفكير ، هو أنك بتستميت عشان تعيش في تابوت مش علي مقاسك

أيوة كل محاولة مضنية أنك تحاول تشبه شخص ما بدون تفكير و لا تطوير ، هو عبارة عن العيش في تابوت لا يخصك و لا مقاسك

أيوة كل محاولة مستميتة أنك تقلد فكرة بدون ما تبحث لها عن تطوير ، و تأخدها زي ما هي،  و أنك تاخد النص ثابت بدون محاولة فهم  كل ما هو و الألمام بجاونب الرؤية و أبعاد الموضوع ، ما هو الإ أنك عايز تعيش في تابوت

دي مثال للتوابيت ، في الصين كانوا مقتنعين ان جمال رجل البنت، في انها تكون مقاس صغير جدا ، فكانوا بيصنعوا مقاسات ، و يجبروا البنت تلبسها من صغرها، الشكل من بره يظهرلك انه حلو ، لكن الحقيقة أن التشوه كان صعب و بشع ، و محدش وقتها للحظة وقف و قال لأ، العقل بيقول أنكم لازم توقفوا الموضوع دي

لما بتحشر نفسك جوا تابوت مش بتاعك بتلاقيك متبهدل و جسمك متشوهو وضعك مزري

زمان سألت ماما ، هو ليه مش بتعمل البسلة و جنبها مكرونة بالزيت (بنسميها حبة و حبة) ، قالتلي مينفعش؟؟ ، ليه مينفعش؟؟، كان ردها مينفعش و خلاص

و لما كبرت عملت المكرونة و جنبها البسلة و كانت جميلة جدا ، أيه المشكلة؟؟ في التجربة و المحاولة و الخطأ ، و عمل مستويات للقياس عليها من 1  الي 9، يعني البسلة مع الأرز أحلي تاخد 8 /9 ،  لكن البسلة مع المكرونة حلوة تاخد 6/9 ، أيه المشكلة؟؟

التابوت كان مذموم في القرآن، مستغرب ليه؟؟ ، التابوت ما هو الإ

وَإِذَا قِيلَ لَهُمُ اتَّبِعُوا مَا أَنزَلَ اللّهُ قَالُواْ بَلْ نَتَّبِعُ مَا أَلْفَيْنَا عَلَيْهِ آبَاءنَا أَوَلَوْ كَانَ آبَاؤُهُمْ لاَ يَعْقِلُونَ شَيْئاً وَلاَ يَهْتَدُونَ(170)

سورة البقرة

ربنا سبحانه و تعالي أرسل الأنبياء و المرسلين أجمعين ، ليدعوا الناس لإعمال العقل و التفكير و المحاولة و الخطأ لأنهم بشر في النهاية ، و اتباع الهدي، العمل في الأرض لإعمارها ، و التعمير لا يأتي ناتج التوابيت و لكن يأتي ناتج العمل و أعمال العقل و الفكر و المحاولة و الخطأ و التطوير

التابوت أنك تعمل نفس اللي عمله الناس حواليك بدون ما تقف للحظة تسأل هل دي ينفع و لا لأ؟؟ ، هل دي صح و لا لأ؟؟

هل أنت عارف تابوتك اللي أختارته شكله أيه؟؟ و كام تابوت عندك؟؟

---------------------------------------

---------------------------------------

Shaymaa Al-okaily

  

أنا جاية من المستقبل و بقولكم عن الفشل

أنا جاية من المستقبل و بقولكم عن

 الفشل

الناس كلها بتخاف من الفشل ، و عشان نكون اكثر دقة ، غالب الناس بتخاف من الفشل ، لأن الفشل مربوط بأمور تانية مختلفة ، زي أننا عايزين نظهر بشكل كامل ، و أن الاراء بتاعتنا صائبة ، و أننا مميزين جدا ، و نكون حد محصلش أبدا، و مفهوم الناس عن الفشل، هو أن رأيك غلط ، و لم تحصل علي ما تريد أو تحقق ما تريد، اذن أنت فاشل

فكرتنا عن الفشل مرتبطة كمان بفكرة سعينا الدؤوب ناحية الكمال ، و أننا نكون آلهة في الأرض أو علي الأقل أنصاف آلهة

بتبص ليه باستغراب؟؟ ، أيوة هي دي النقطة اللي جوا كل واحد فينا ، أننا عايزين نوصل حد الكمال و نكون من الألهة أو أنصاف الألهة ، و الدليل؟؟

الدليل أن افلام سوبر مان ، وباتمان ، و السحر ، وقوة الخير، و قوة الشر، لها الحشد الأول في المتابعة في كل مكان علي التليفزيون و غيرها من وسائل المتابعة ، الدجالين و العرافيين هم من الناس المهمة ، لأنهم يعلموا اللي احنا منعرفوش ، دي بتفكيرنا و تفكيرهم ، دايما بتسعي عشان تصلح الكون في البداية ، و تكون نصف آله ، زي ما كانت فكرة الفراعين زمان ، و ازاي هناك دم ملكي ،  و دم من الناس العادية ، و أن فيه آله يحكم هذا الأرض

ليه الربط بين الفشل ، و بين فكرتنا أننا نحاول نكون آلهة ، لأن الفشل و أن رأيك مش صح ، هتنزلك من نظر نفسك و بالتباعية هتنزلك من نظر الناس، و أنت عايز تحافظ علي دي ، ازاي اكون فاشل؟؟ ، أو هتخليك تحكم علي الناس عشان تحس أنك مميز عنهم ، الحقيقة أني معرفش مين ربط كلمة الفشل بالأفراد، و حط ليها تعريفات غريبة جدا

مما أعجبني للشيخ سلمان العودة ، توضيح أن كلمة فشل في غالب القرآن كانت في موضعين ، و غالبا ما ارتبطت مع الجماعة

في قوله تعالى: (( إِذْ هَمَّتْ طَائِفَتَانِ مِنْكُمْ أَنْ تَفْشَلا وَاللَّهُ وَلِيُّهُمَا وَعَلَى اللَّهِ فَلْيَتَوَكَّلِ الْمُؤْمِنُونَ ))[آل عمران:122]

. وفي قوله تعالى: (( وَلا تَنَازَعُوا فَتَفْشَلُوا وَتَذْهَبَ رِيحُكُمْ وَاصْبِرُوا إِنَّ اللَّهَ مَعَ الصَّابِرِينَ ))[الأنفال:46]. 

التنازع و التناحر سبب ، و أنك تنكث الوعود و توقف محاولات الأصلاح سبب تاني للفشل ، يبقي غالبا الجماعة كلها من الممكن ان تعاني من الفشل لو تنازعت ، و التنازع هنا لا يعني أنها طول الوقت متفقة ، لكن يعني أنها من الممكن ان تختلف بشكل كبير ، لكن يحترم كل منهم اختلاف الأخر و يسانده ، يبحث عن مناطق الأتفاق أكتر من البحث عن مناطق الأختلاف للتعايش، و النقطة التانية هي وعود و محاولات الأصلاح و الألتزام بها ، يعني نقدر نقول السير علي طريق الله ، المحاولات المستمرة لإرضاء الله ، و أصلاح أنفسنا و أنشغالنا بأنفسنا و أصلاحها عن انشغالنا بالغير

بالمناسبة بحثت عن كلمة فشل في الأحاديث النبوية و لم أجد 

 

لو قلنا أن الفشل بالمعني اللي الناس بتقول عنه ، أن الشخص ينجح في الحصول علي اللي هو عايزه ، و كمان يكون رأيه صائب ، و لو لم يحصل عليه يبقي فشل ، و لو كان رأيه خطأ يبقي فاشل

قال الشيخ سلمان العودة لو تأملت سير الأنبياء عليهم الصلاة والسلام، مثلاً موسى لما ذهب إلى النار: (( قَالَ لِأَهْلِهِ امْكُثُوا إِنِّي آنَسْتُ نَارًا ))[القصص:29]. 

لكن سيدنا موسي لما ذهب لم يجد النار، و لم يحصل علي مراده، هل معني كده أنه فشل، طبع لأ ، بل حصل علي ما هو أعظم من مراده

الرسول صلي الله عليه و سلم ، لما ذهب للطائف ، إذا سلمنا بقول الناس عن الفشل و فهمهم الذي يحاولوا بكل الطرق أن يثبتوه و يزرعوه بداخلنا، أنه الحصول علي ما تريد و يكون وفق هواك ، و يكون رأيك صائب ، لن ينطبق علي رحلة الرسول صلوات الله عليه ، و لكن الأمر أعظم من ذلك ، الأمر فيه قوة المحاولة و الأستمرار لأصلاح النفس و وعظ الغير، حتي لو لم تحصل علي ما كنت ترجو من النتائج، و الدليل أن الرسول في البداية نظر لنفسه ، و رغم أنها كانت ساعة من التعب الشديد و لكنه أمسك غضب نفسه ، رغم أن الله أرسل اليه ملك الجبال ليطبق الأخشبين علي من آذي الرسول ، و لكن الرسول دعي لهم و قال عسي الله أن يخرج من أصلابهم من يعبد الله، و الحمد لله قد اصابت دعوته حتي يومنا هذا،

أنتم أيه تعريفكم عن الفشل؟؟

------------------------------------------------------------------------------------------------------------

------------------------------------------------------------------------------------------------------------

Shaymaa Al-okaily

 

$Kill Kid$ Program$ -Cash Kids-الحلقة رقم 2

$Kill Kid$ Program$

Ca$h Kid$

الأطفال و الفلوس

الطفل المفترض يتعلم لغة الفلوس و التعامل معها ، في البيت و في المدرسة ، و في كل مكان ممكن يساعد علي كده

غالبا ، مش بيتعلم لا في البيت و لا في المدرسة و لا في أي حتة

ليه؟؟

لأني لما قلت في البداية لغة الفلوس، جه في دماغك و أنت بتقرأ، يعني عايز ابني انسان مادي؟؟ لأ طبعا ، عايزه ميكونش عنده قلب ، مستحيل؟؟، و ليه يتعلم؟؟

كل الصور اللي مش ظريفة عن الفلوس بتيجي في دماغنا ، ناتج ثقافة خطأ مزروعة فينا من و أحنا صغيرين

الفلوس زينة ، و المال وجوده قوة ، قوتك في أنك تخلي الفلوس في ايدك ، في جيبك ، في الحسابات و أنت بتحسب بعقلك ، لكن مش في قلبك

قوتك في أنك تستطيع التخلي عن وجودها رغم وجودها ، و نخلي وجودها لا يؤثر عليك و أنت بتفكر تساعد الناس، و تستطيع عمل ما ينفعك و ينفع غيرك بها، قوتك في انك تتخلي عن أنك تكنزها و متكونش بخيل و مش بتسند حد

  عدم تعلم معني الفلوس و ازاي اخليها في ايدي مش في قلبي ، و ازاي اقدر احصل عليها بكل سهولة ، و ازاي اقدر اوظفها ، هي دي النقطة المهمة التي تسبب للناس مشاكل كتير جدا ، من أمثلة المشاكل دي

أن الفقير مش بيعرف يعيش و يكون معه فلوس، و بالتالي ابنه بيطلع يتعلم طرق الفقر و ليس طرق الغني

أن اولاد الأغنياء ، المتعلمين ، فاهمين طرق الحصول علي الفلوس ، هم اللي بيفضلوا اغنياء

ان اللي بيدفع الضرايب الفقير ، لكن الغني ، بيعرف طرق تعوضه دفع الضرايب ازاي ، أنا بتكلم عن الأمور المشروعه

طول ما أنت فقير ، فقرارت حياتك واقفة و لا تعمل ، لأن الاغنياء هم اصحاب القرار ، لأن القوة المالية ، قوة لا يستهان بها

خلينا نكون فاهمين ، أن الفقر ليس عيبا ، و الغني ليس شرفا ، لكن ربنا أحل لينا طرق كتير نكسب منها لنعيش حياة جيدة ، كمان المؤمن القوي أحب الي الله من المؤمن الضعيف ، و من أساليب القوة وجود قوة مالية

محاولاتك الحصول علي الفلوس بطرق شريفة متعددة هي اصل من اصول الدين الحنيف

محاولاتك أن تعيش حياة نظيفة راقية تستطيع أن تعبد فيها الله ، لا تتنافي بأي حال من الأحوال مع أن الله قدر للناس الأرزاق

و قدر الله ، ليس قدر اجبار علي أحد ، و لكنه قدر علم بما يفعل العباد ، لأن الله وسع علمه كل شئ

علم الله: فإنه سبحانه يعلم ما كان, وما سيكون, وما هو كائن, وما لم يكن لو كان كيف يكون، لا يخفى عليه من ذلك صغيرة ولا كبيرة

 يعني ربنا يعلم ما كان في الماضي ، و ما سيكون في المستقبل ، و ما هو كائن في الحاضر ، و ما لم يكن لو كان كيف يكون ، دي جملة مهمة جدا ، و هي لو مكنش اللي بيحصل دي بيحصل ، لو حصل فيه تغيير بشكل ما كيف هتكون الصورة؟؟،

 دي السؤال اللي دايما بنقوله ، و نفترض ان النتيجة هتكون وردية بشكل كامل بدون علم ، يعني لو مكونتش مشيت هنا ، كان زمان بقيت كذا و كذا ، غالبا تخيلنا بيكون وردي جدا بدون ما نلم بتفاصيل كل الصورة ، و نشوف الصورة بشكل كامل

الأم متعرفش يعني ايه فلوس؟؟ ، و الأب ميعرفش منين يجيب الفلوس؟؟، و بالتباعية هم و الأولاد عايشين في فقر و تخبط بدون فلوس

 

يبقي لازم نتعلم كلنا ازاي نفهم لغة الفلوس ، و نفهم يعني ايه يكون معانا فلوس؟؟، و أزاي نشيلها من قلبنا و ازاي تكون في ايدينا فقط

 

Shaymaa Al-okaily

 

$Kill Kid$ Program$ -Cash Kids-الحلقة الأولي

Ca$h Kid$

$Kill Kid$ Program$

المهارات المالية للأطفال

مشكلتنا أننا اتربينا علي موضوع مينفعش يبقي معانا فلوس

الفلوس هتغير نفوسنا و نخسر الأخرة

 ساعة ما بتشوف الفلوس أو بتجيلك بتكون بالظبط و ينطبق عليك

you feel like

أجري يا مجدي

بنخاف من الفلوس خوف العمي ، و نحبها حب شديد ، و عايشين في صراع التنانين للأسف

أيوة صراع التنانين ، صراع صعب جدا ، شايفين كل شخص غني ما هو الإ حرامي

 

شايفين كل شخص بيقبض راتب و قدره ، هيكون أنسان باع المبادئ التي تربي عليها

ساعة ما تيجي تتكلم علي الفلوس ، نرد و نقول أعوذ بالله من كلمة أنا ، أنا شخص غير مادي بالمرة ، و الفلوس مش بتهمني

و كل مرة مع كل أختبار بنرسب فيه، و المقصود بالأختبارات دي ،  كالتالي

* كيف نحصل علي الفلوس

* كيف ننفق الفلوس

* كيف لا نفتن بالفلوس

* كيف يكون المال في الأيدي لا في القلب

* الرسول كان فقير

 وغالبا عمالين نقول أننا زاهدين في الحياة

  

مع أنك لو ركزت شوية هتعرف أن الزهد بيكون عن غني و ليس عن فقر

و الأغنياء ليسوا دائما ، ناس باعت المبادئ ، أو ناس مرتشية ، أو حرامية ، فيهم أو بعضهم و ليس الكل ممكن يكون مرتشي او حرامي

كونك مشعارف تعمل فلوس ، و لا تكسب فلوس ، دي لا ينفي أن الفلوس موجودة و ممكن أي حد يكسبها، أنت اللي فقط مشعارف تكسبهم أزاي؟؟

لازم تفهم دي كويس ، كونك مش شايف الشمس ، ممكن يكون أنت اللي أعمي أو الجو ضباب ، لكن هذا لا يعني أن الشمس مش موجودة

البرنامج مهم جدا نتعلمه و نفهمه و هنستعرض فيه بعض الأمور المهمة علي مدار الحلقات الجاية

Shaymaa Al-Okaily

التوهان-تائه في الحياة-Get Lost

 

Get Lost

 

تائه

أحيانا بنعيش بشعور التائه

مشعارفين رايحين فين؟؟

طيب و بعدين؟؟

و أفرض أني وصلت و طلع دي مش اللي أنا عايزه ، و أفرض أنه انضحك عليا، و نعيش في فرضيات مختلفة ، من ضمنها الناس اللي بتفكر كتير جدا و يقال عنهم 

Overthinking People

طيب و الحل في حالة التوهان دي؟؟، هتخلص أمتي ، و هنعرف أمتي نعيش؟؟

مهما كنت عايش في حالة التوهان و مسيطرة عليك، مهما حصل متوقفش السعي ، السعي دي أسلوب حياتك المطلوب

مهما حصل خليك مركز علي أنك عارف أخر السعي و متيقن منه ، و هو أنك عايز توصل لربنا و يرضي عنك ، أذن عليك أنت تتذكر النهاية و تخليها في دماغك و ذهنك ، و تحاول أن تسعي ، دي اللي ذكره ستيفن كوفي في كتابه العادات السبعة لأكثر الناس فاعلية ، أعملك و عينك علي النهاية

كما ذكر الله سبحانه و تعالي في القرآن

﴿ وَأَنْ لَيْسَ لِلْإِنْسَانِ إِلَّا مَا سَعَى (39) وَأَنَّ سَعْيَهُ سَوْفَ يُرَى (40) ثُمَّ يُجْزَاهُ الْجَزَاءَ الْأَوْفَى (41)﴾

ناس كانت تايه ، و مشعارفة تعمل أيه ؟؟ ، و لا هتروح فين؟؟ ، لكنها عارفة نهاية الطريق بشكل قووي  ، و كان كل ما عليها هو السعي ، و ليس ضمان الوصول

مهما كان ما عانيت في حياتك كل ما تملكه هو السعي ، و لا شئ غيره ، لكن حاول تكون عارف نهاية الطريق ، و عينك عليه ، و أنت بتسعي حتي لو موصلتش لنهاية الطريق ، ربنا هيشوف السعي دي كله , و هتكون نتيجة سعيك مرضية ، لأن ربنا هيطلع عليها و هيرضيك و دي صدقا و حقا

أثبتلي؟؟

هناخد نماذج مختلفة و نشوف السعي كان شكله أيه؟؟

الرجل الذي قتل 99 نفس  في حديث الرسول الكريم ، سيدنا محمد عليه الصلاة و السلام

خلينا نحلل الأمر

قص النبي صلى الله عليه وسلم قصة رجل أسرف على نفسه ثم تاب وأناب فقبل الله توبته ، والقصة رواها الإمام مسلم في صحيحه عن أبي سعيد الخدري رضي الله عنه أن رسول الله صلى الله عليه وسلم قال : ( كان فيمن كان قبلكم رجل قتل تسعة وتسعين نفسا ، فسأل عن أعلم أهل الأرض ، فدُلَّ على راهب ، فأتاه فقال : إنه قتل تسعة وتسعين نفسا ، فهل له من توبة ، فقال : لا ، فقتله فكمل به مائة ، ثم سأل عن أعلم أهل الأرض ، فدُلَّ على رجل عالم ، فقال : إنه قتل مائة نفس ، فهل له من توبة،  فقال : نعم ، ومن يحول بينه وبين التوبة ، انطلق إلى أرض كذا وكذا ، فإن بها أناسا يعبدون الله ، فاعبد الله معهم ، ولا ترجع إلى أرضك ، فإنها أرض سوء ، فانطلق حتى إذا نصَفَ الطريق أتاه الموت ، فاختصمت فيه ملائكة الرحمة وملائكة العذاب ، فقالت ملائكة الرحمة : جاء تائبا مقبلا بقلبه إلى الله ، وقالت ملائكة العذاب : إنه لم يعمل خيرا قط ، فأتاهم ملَكٌ في صورة آدمي ، فجعلوه بينهم ، فقال : قيسوا ما بين الأرضين ، فإلى أيتهما كان أدنى فهو له ، فقاسوه فوجدوه أدنى إلى الأرض التي أراد ، فقبضته ملائكة الرحمة . قال قتادة : فقال الحسن : ذُكِرَ لنا أنه لما أتاه الموت نأى بصدره ).

الرجل كان عارف نهاية الطريق ، أن فيه نور ، و أنه عايز يوصل لربنا ، و عايز يتوب، 

عمل أيه سلك كذا طريق ، راح للعابد ، و أخطأ في الطريق ، اذن الخطأ في الطريق وارد يحصل مهما حاولت أنه ميحصلش، و وارد علي الطريق دي ترتكب أخطاء ، زي الرجل دي لأنه قتل 99 نفس و كملهم بأنه قتل العابد،

 هل توقف عن السعي؟؟!!

 الحقيقة أنه كمل و فضل يبحث رغم حالة التوهان الفظيعة ، و تأنيب الضمير اللي بيمر به، لأنه كانت مشاعره متلخبطة و في حالة تخبط شديد نفسيا و عقليا و ذهنيا، حاول أن يتوب  ، و لكنه لم يستطيع، حاول الذهاب لله ، و ايجاد طريق الله ، لكنه لم يستطيع، هل توقف

 لم يتوقف، و لكنه حاول مرة أخري

 و ذهب للعالم ، و سأله هل لي من توبة؟؟ ، و رد العالم و قال نعم ، و لكنك عليك أن تحاول ، و تترك القرية التي أنت فيه

 نفسر وضع الرجل القاتل ، كان واعي و مدرك لما يفعل رغم التخبط الشديد في مشاعره و في عقله، رغم طريقه اللي كان غلط و أكيد انه مكنش طريقين بس، أكيد كان اكتر من اتجاه في خلال الطريقين  ، الإ أنه أبدا لم يوقف السعي

 نفهم أنه كمان ، الظروف المحيطة مهما جدا أنك تهيئها ، عشان تناسب نهاية الطريق اللي أنت بدور عليه ، و تقدر تغيير ظروفك حتي لو كان بترك المكان كله ، و في بعض الأحيان الناس بتنظر للأمر علي أنه صعب جدا أنها تترك المكان و ما تعودت عليه 

 هنتعلم كمان أن الرجل حاول يسعي عشان يحصل نتيجة لهذا السعي ، لكنه لم يموت في البلد الصالحة وسط الصحبة الصالحة ، مات علي الطريق ، و لم يحصل النتيجة التي كان يتوقعها، و لكن ربنا عوضه بالنتيجة التي أنتظرها و أكثر منها ، لأنه عمل كل ما ينبغي عمله للسعي ،  و دي يؤكد أن النجاح و التفوق و الشهرة و المال و كل ذلك ، ما هو الإ أعراض جانبية للأتقان و محاولة المواصلة السعي و الأتقان عن وعي و أدراك فيه

أذن المطلوب منا كأشخاص بنسعي ، الادراك و الوعي لكل ما يمر بنا قدر الامكان ، تهئية الظروف بكل المحاولات المستميتة حتي تساعدنا للوصول لأهدافنا ، الأتقان المستمر لما نعمل و نسعي ، أختيار الصحبة المناسبة و التي مرت بظروف مشابهة لتعين علي الحياة

Shaymaa Al-okaily

اليأس و الإحباط

اليأس و الإحباط

فيه فرق شاسع قوي بين العواطف و المشاعر، العواطف قلنا أنها الشئ الثابت و المتزن زي عاطفة الأمومة ، المشاعر هي اللي بتكون مش مستقرة، زي مشاعر الغضب

استغربت كتير و أنا بفكر ، ليه كانت وصية الرسول صلوات الله عليه و سلامه لأحد الرجال، هي "لا تغضب"، الكل بيتكلم من منظور و رؤية أن الغضب بيكون محرك النار اللي بتحرق كل شئ ، أن الغضب ممكن يكون مؤثر علي قرارتنا، و ساعتها الخساير هتكون فادحة

و بعض المفسرين قالوا ، لأن الغضب من الشيطان ، محدش يقدر ينكر أن الأصل في الحياة هي الرؤية المختلفة لنفس الشئ ،   عشان الابتلاء هيكون في التواصل ، و كيفية التعامل مع النفس و الأخر، غالبا بنحاول جاهدين في فهم الأخر، و بنترك نفسنا بدون أي استفهام حوالينا تصرفاتنا ؟، و ليه عملنا كده ؟ ، و ليه عايشين دور الضحية أو دور الشخص القوي

دايما كلمات الرسول من وجهة نظري بتحمل معاني كتير جدا و بتحمل رؤي متعددة ، و دي عشان الاعجاز ، و الإيجاز ، و توصيل الأمر، و عشان كل عصر هينظر للكلمات دي بشكل مختلف طبقا لمتطلبات العصر اللي هو فيه ، و طبقا لما توصل له هذا العصر من جديد في العلم

الحقيقة أن الرسول كان بيقول للرجل بمفهوم عصرنا الحالي سيطر علي مشاعرك ، و علي رأسهم المحرك الأكبر و هو الغضب، سيطر علي مشاعرك ، الناجح ليس الذي يمتلك ذكاءا اكبر ، و لا سلطة أوسع ، و لكنه هو من يتحكم في مشاعره ، و لذلك جاءا الحديث الثاني حديث القوي و تعريف من هو القوي ، هو الذي يملك نفسه عند الغضب ، برده توجيه جديد بالتحكم في المشاعر ، لأن مهم جدا نوصله

اليأس و الأحباط مشاعر أيضا تسيطر علينا عندما نشعر أن كل شئ خرج عن حدود السيطرة ، الحروب و الجوع و الفقر و الأخطاء تملأ المكان و لا نستطيع التحكم فيها ، و الفوضى تعم الكون بأكمله ، و هنا يأتي النقطة المفترض أن نعلمها

ليس مطلوب منك التحكم في العالم أو تغييره ، أنت مطلوب منك فقط أن تغيير و تتحكم في نفسك من جهة الفعل و رد الفعل فقط لا غير

و اليأس و الأحباط مشاعر تسيطر علي أي شخص، فيلجأ للتسويف و يلجأ ل اللوم علي الأخرين و تحميل من حوله ما عدا هو أنهم سبب فشله الذريع ، و لكنه لو توقف لدقائق بسيطة هيعرف أنه مطلوب منه التحكم في نفسه و جعل نفسه نسخة أفضل مما هو عليه الآن

لذلك راجع مشاعرك بأستمرار و اعملها 

update

زي ما بتعمل لموبيلك و هدومك و أكلك و كل شئ، المشاعر و الأفكار مهم جدا تعملها التحديث المستمر ، حتي في علاقاتك مع الناس ، أتعلم أن الزمن الجاي هو زمن الشخص اللي هيقدر يسيطر علي مشاعره و يقدر يضع امره في النصب الصحيح ، و كل قراراته هتكون مدروسة بشكل صحيح بعيد عن الانفعالات المؤذية للقرارات، أو يموت علي الطريق الصحيح ، 

اليأس و الأحباط بيسطر علينا ،خلي بالك من الوصية و سيطر علي مشاعرك قبل أي شئ

Shaymaa Al-okaily

أنا جاية من المستقبل و بقولكم عن المسئولية

أنا جاية من المستقبل و بقولكم 

عن 

المسئولية

أتعلمنا أن المسئولية دي شئ صعب قوووي ، و حاجة وحشة موت، و ريحتها مقرفة

السبب ، حاجات كتيرة جدا، ممكن تكون الأفلام، ممكن طريقة عرض قصص الناجحين، اللي دايما ربطت ، أن الشخص الناجح هو الشخص اللي معندوش أولاد و لا عندوش أسرة تسببت في تعطيل نجاحه، ربط الست اللي عندها أولاد بأنها ست عايشة في فشل، و الست اللي معندهاش زوج و اولاد هي اللي ناجحة و لامعة 

خلي بالكم من اللي الناس بتصدره لكم

 ربط أن عالمة الذرة لازم تستقيل عشان مشعارفة تربي ابنها، ربط أن الزوجة اللي ناجحة في زواجها متجوزة من واحد عادم ناسه، أبوه و أمه ميتيين، الحقيقة أن دي كله مش صح مطلقا، كلنا عايشين تحت تأثير كاتب مؤمن بفكره ، مخرج مؤمن بموضوع معني، مذيع مؤمن بمقولة ، و من كتر ربط نفس الفكرة و الموضوع و عرضهم في أكتر من مكان بأكثر من طريقة، من كتر ما صدقنا الفكرة و الموضوع و نفذنا الأمر تلقائيا

 خلي بالكم من اللي بيدخل دماغكم يوميا، زي ما ربطوا الشيكولاتة بتأثير أنك عامل دماغ ريلاكس، الحقيقة أنكم بتأكلوا الشيكولاتة و مش بتعملوا دماغ ريلاكس و لا حاجة، فيه مقالات متميزة جدا أتكتبت في الموضوع دي ، يمكن هيتم عرضها عشان الاستفادة لاحقا

الحقيقة هنا أن أي حاجة بتسبب مشكلة للأنسان أو بضايقه، إذا ربطها بشئ ممتع أصبحت ممتعة، دي أساس، حتي الأنسان ، زي الأب و الأم

مثلا لو الأب و الأم دايرة لذة و سعادة و هنا لأولادهم، هتلاقي الأولاد متمسكين بهم و عايشين معاهم و الأب و الأم سعداء، و لو الأب و الأم سبب الألم و التعاسة للاولاد ، هتلاقي الأولاد بتهرب منهم بالمشوار

المسئولية لو فضلت رابطها بالألم هتفضل تجري منها بالمشوار ، و مش هتشيل مسئولية أبدا، لكن لو ربطها بشئ محبب للنفس ، هتلاقيك بتحبها

لو ربط وجودك مع أولادك بلحظات حلوة هتلاقيك ، و تلاقيهم في علاقة حب شديدة ، هتخلي مسئولية تربية الأطفال أسهل كتير مما تتخيل، لو ربط مسئولية الأولاد بالنكد و الضنك، هتلاقيك بتجري منها بالمشوار، و بترميها علي أي حد

اذن القاعدة، أربط الأشياء بالمتعة و أعمل رابط صح، هتلاقيك في نجاح مستمر

موضوع تاني، العبادات، رغم أن الصلاة ممكن تشغل حيز يومك 30 دقيقة فقط، الإ أنهم أصعب 30 دقيقة في حياتك، لأنك رابط الأمر بالتعب، و الأرهاق، لكن لو ربطها بشئ جميل، هتلاقيهم أحلي 30 دقيقة ممكن يعدوا في عمرك، الدليل علي كده حديث الرسول صلي الله عليه و سلم ، "جعلت قرة عيني في الصلاة"، متخيل كلمة قرة عيني

قرة العين أعلي احساس ممكن توصله في علاقتك مع الأشياء

من الأخر بتوصل للأحساس دي، إذا حاولت تخلي دماغك تربط الشئ بحاجة حلوة ، و تفضل تحاول مرة علي مرة لحد ما توصل، " دي الأسباب اللي ممكن تعملها"، و التوكل هيكون أنك تفضل تتدعي ربنا سبحانه و تعالي يساعدك، و الأمر في الأول و الأخر بيد مدبر الأمر كله " الله"

Shaymaa Al-Okaily 

أنا جاية لكم من المستقبل و بقولكم عن التغيير

أنا جاية لكم من المستقبل و بقولكم

عن

التغيير

 

معظمنا فاكر أن التغيير عبارة عن قفزة كبيرة قووي مرة واحدة، لكن الحقيقة المثل البسيط الخاص بالفراشة  

""لو أن فراشة هزت جناحها في مكان ما، قد تسبب اعصاراً في مكان آخر من العالم

هي دي الحقيقة، الكل هيفهمك أن التغيير دي حاجة جامدة، و مش أي حد، يقدر عليه، الحقيقة أن التغيير عبارة عن شئ أنتقالي بسيط جدا،

" تخيل كده أنهم بلغوك أنك لازم تنقل طرابيزة السفرة (اللي هي عبارة عن قطعة واحدة مش متفككة)، من غرفة السفرة لغرفة الصالة و الإ هتخسر ثروة قيمتها مليون دولار " لأن فيه ناس جاية تزورك و هتديك المبلغ دي" ، شروط الموضوع أن الامر يتم بدون مساعدة من أي شخص، و خلال 30 ساعة فقط لا غير ، هتعمل أيه؟؟، 

غالبا هتبدأ تفكر كالتالي:

1- هتشوف السفرة هتعدي من باب السفرة أزاي، يعني محتاج تقلبها علي الجنب ، و لا ممكن تخرج عادي من الباب؟؟

2- هتفكر أزاي تزيحها و تحركها خطوة بسيطة بخطوة بسيطة

3- هتبدأ تضع خطة للتحريك ، عشان متفقدش قوتك مرة واحدة، أو يروح عليك الوقت المحدد للمهمة ، و هتعمل خطة زمنية مناسبة ممكن نقول خطة زمنية مدتها ساعتين علي أن يتم تغيير الخطة بعد ساعتين، لو محصلش جديد في أمر أنتقال السفرة

4- هتحركها خطوة خطوة

5- طبعا مش هتقعد تفكر كتير، هتفكر في خطة مناسبة ، و تنفذ و تبدأ تغيير خطتك في التنفيذ كل ساعتين عشان الوقت ميروحش منك،

6-في كل الاحوال هتنفذ و تبدأ تشوف هل الخطة مناسبة و لا لأ؟؟ لحد ما توصل لهدفك، و كل ما تعطل ، هتحاول تاني

7- هتوصلها لغرفة الصالة، و هتشوف ممكن تتدهل من الباب أزاي؟؟

تقريبا فقدت الأمل و تعبت و فشلت 1000 مرة ، و أنت بتحاول في رحلة نقل السفرة من غرفة السفرة الي غرفة الصالة.

التغيير change هو أن السفرة أتنقلت من غرفة السفرة لغرفة الصالة و دي اللي اتشاف للناس اللي جاية تزورك ( أذن الناس شافوا التغيير)

الأنتقال Transition هي العملية اللي تم من خلالها التغيير ( الخطوة بخطوة و المحاولات الكتيرة)، الوقت و ما حدث فيه اللي أنت عشتوا لوحدك، و محدش غيرك عاش الفترة دي

عمرك شفت قطار بيغير مساره فجأة، الحقيقة أن "نقطة التحويلة" هي دي نقاط التغيير، اللي بيظهرعندها التغيير فعلا للعين و للانسان ، و السكة بتاعت القطار طول الوقت و هي ماشية في طريق التغيير هو دي المقصود به الانتقال " transition"، اللي بيحصل عشان يوصل لنقطة التغيير،

قصة تغييرك ، قصة مليانة بالانتقالات المليانة بالدموع اللي مفيش غيرك هيبكي فيه، هيجي شخص يشوف التغيير في صورته و يحكي القصة في كلمتين بالحماس اللي يسند الناس و أنت مكنش فيه حد بيسندك

أنا جاية من المستقبل و بقولكم ، ركزوا علي الانتقالية عشان توصلوا للتغيير، أعملوا كل يوم خطوة و ثبتوا الخطوة،  و تبتوا عليها عليها عشان توصلوا للوحة التغيير الكاملة

Shaymaa Al-okaily

جاية لكم من المستقبل و بقولكم-بداية السلسلة

جاية لكم من المستقبل و بقولكم

:)

سلسلة مقالات هكتبها  و أحنا بنتكلم عن الشغف

كتير يا أما بنلطم علي الماضى اللي راح،  او بنفكر في المستقبل

هنا أنا جاية لكم من المستقبل ، و بقولكم محتاجين تعدلوا أيه في الحاضر؟؟

هيحصل أيه هناك، أعتبروني زي آلة الزمن ، هقولكم صلحوا أيه في الحاضر؟؟

  عشان المستقبل بتاعكم يتصلح

عارفين لما كنا بنتفرج علي أفلام السفر عبر الزمن ، و نلاقي الدنيا اتبهدلت بسبب تعديل في الحاضر، مش دايما البهدلة وحشة بالمناسبة ، لكن البطل بيخاف من أنه يتبع البهدلة دي او يحافظ عليها ، فبيرجع في كلامه

مؤمنة جدا بأن ربنا بيضع في طريقنا أشارات ، و علامات ، مواقف و غيره ، إذا أحسن كل شخص منا فهم العلامة هيكون طريقه مختلف ، و أفضل كتير، و مؤمنة جدا أنك لو حاولت جدا طول الطريق تفهم الأشارات، هتنتهي حياتك بأفضل صورة ممكنة ليك و لنفسك و لمن حولك و للكون كله، لأنك في النهاية جزء بسيط في كون كبير، و لأن ربنا سبحانه و تعالي أسمه المدبر " ويدبر الأمر كله" و يختار الخير كله للعباد ، البر منهم و الفاجر

في سلسلة المقالات دي هشرح كل علامة معناها أيه لو ظهرت؟؟، أمتي ناخد بالنا من العلامات و نفهمها ازاي؟؟

أنا مش منجمة و لا مشعوزة، أنا هحكي عن الماضي و أيه اللي حصل فيه، و توقعات المستقبل ، و أيه الخطوة البسيطة اللي لو حصلت هتغير كتير؟؟

برده أنا مش بشتغل في التاريخ و لا بفهم جدا فيه و لا في التفسيرات، "و دي جهل مني طبعا"، لكن أنا كلامي هيدور عن الأنسان ، عن النفس عن شخصيتنا أحنا، من خلال دراستي لشخصيات الناس اللي نجحت و سيرتهم الذاتية

علي بركة الله نبدأ المسيرة

Shaymaa Al-okaily