نصيحة ذهبية-أشتغل في شغفك

نصيحة ذهبية

لو عايز تعمل بيزنس و ينجح، أعمله في حاجة بتحبها مش في شئ الناس بتعمله عشان هو ناجح

ايه الفرق؟؟

الفرق بيكون 

لما تعمل بيزنس في حاجة بتحبها، لو وقعت -لا قدر الله- هترجع تاني و تكمل، و لو نجحت هتبدع ، لأنك بتتعامل مع شئ بتحبه، لو وقعت منك و البيزنس فشل، هتقعد تفكر أسبابا فشلك أيه و تحاول تاني؟؟

طيب لما يبقي البيزنس بتاعك أنشئته عشان شفته ناجح مع غيرك، يعني مثلا لو واحد فتح سوبر ماركت في الشارع ، و نجح ، تاني يوم تلاقي الشعب كله ، و المحافظة كلها فتحت سوبر ماركت، الحقيقة أن بدام الشئ أنت مش بتحبه مش هتكون مهتم بتتطويره ، و لا بتغييره ، و لو فشل هتتضايق عشان فلوسك للأسف ضاعت ، و مش هتفكر تقعد تفهم أسباب فشلك في أدارته إيه؟؟

نقطة مهمة ، الأنسان بيحب ينجذب لدوائر اللذة، يعني أيه؟؟

يعني هتلاقيك بتحب تقعد مع صاحبك اللي بيضحك معاك و بيهزر و بتحس أن الوقت ممتع معه، هتلاقي ابنك بيحب أنه يقعد مع حد بيضحكه و مش بيرضي يقعد معاك عشان بتزعق معه، أي حد في الدنيا بيحب يقعد و بيحب يتكلم و بيحب يروح للأنسان أو للمكان اللي بيخليه يشعر بالمتعة و السعادة

مثال لو جايلك مكالمة من اخوك و هو كل ما يشوفك بينكد عليك و يشيلك الهم و جايلك مكالمة من صاحبك و هو فرفوش و بيضحك، هتلاقي مكالمة اخوك صعبة علي نفسك و مكالمة صحبك أحلي، لو أنت بتشتغل في حاجة بتحبها هتبقي دايرة لذة ليك و هتعمل المستحيل عشان تكبرها و تخليها أحلي حاجة

أشتغل في شغفك

Shaymaa Al-okaily