Passion to Businees; المشاعر و العواطف

المشاعر و العواطف

فيه فرق كبير بين المشاعر feeling  و العواطف emotion، و دي مهم جدا لازم نعرفه، فيه كتب أجنبيه بتحكي عن الأمر كتير، لكنه مش مجالنا هنا، بإختصار شديد، المشاعر بتاعتنا ممكن تكون لحظية و ناتجة عن استثارة حالية زي الغضب و الفرح ، يعني مثلا تكون غضبان جدا فتعاقب حد بيحبك وتجرحه، او تكون في قمة السعادة اللحظية فتوعد وعد متقدرش تنفذه.

العواطف هي الشئ اللي عنده حالة ثبوت لمدة طويلة و أصلي جوا الأنسان ، مش متقلبة زي المشاعر، زي مثلا عاطفة الأمومة، ممكن الأم تكون غضبانة ومشاعرها ثائرة ناحية الأبن فتعاقبه، لكن حقيقتها أن عواطفها متجهة ناحيته و بتحبه.

ليه بنتكلم عن المشاعر و العواطف، لأنه مينفعش فجأة تقول أنا بحب الشئ دي ، و هو شغفي غير لما تتأكد هو أنت بتمارسه ، هل بتمارسه ناتج مشاعر و لا ناتج عواطف؟؟.

مثلا، طالب في ثانوية، جه أختار النشاط ( موسيقي ، و لا رسم ، و لا زراعة) مثلا، و الطالب دي عنده نبات مهتم به ، و حياته كلها في حب الزراعة، المهم في المدرسة، قالولهم أنهم هيحضروا حصة في كل نشاط علي مدار اليوم عشان يشوفوا أنهي نشاط هيشتركوا فيه، المهم راح الزراعة ، لاقي المدرس بيقول معلومات هو عارف اكتر منها، حس بملل للحظات، لما راح الموسيقي، لاقي المدرس نشيط و العزف بقي، حس كده أن الموضوع كيوت، المهم كتب أنه هيشترك في الموسيقي، و بعد ما اشترك بدء ياخد السلم الموسيقي و الايقاعات و ما إلى ذلك، أكتشف ان المتعة اللي شافها في البداية كانت مش حقيقية كانت ناتجة عن مشاعر احساسه بالملل لما دخل حصة الزراعة، و ملاقش معلومة جديدة بالنسبة ليه، و دخل حصة الموسيقي و لاقي فرفشة بعد حصة كانت بمقايسه كئيبة، هنا فكرته أن شغفه هو الموسيقي ناتج عن مشاعر، و فكرة ان الزراعة شغفه دي عواطف.

عشان كده فيه بعض الأمور لازم تمارس فيها الأمر عشان تتحقق إذا كان دي شغفك أو لأ؟؟، يبقي الممارسة أساس الأمر ، و المحاولة ، و أنك تسعى في الطريق للتأكد، محدش هيقدر يتأكد من الشئ الإ لو مارسه فعلا و مر بتجربة معه. 

عشان كده في الغرب لما تسأل حد يقول Who Knows??, Nobody knows، لا أحد يعرف؟، من يدرى؟؟ ، تظل كل تجربة فريدة بذاتها في مجال بشريتنا، بشريتك سر مهم جدا في الحياة، لا يستطيع أحد أن يتنبأ بنتائج محددة ، و هذا من حلاوة ما تقابله في الحياة، عدم القدرة علي التوقع بشكل قطعى يجعلك مطالب بالسعى و التعلم و المحاولة و الخطأ و المحاولة مرة أخرى و هكذا.

فهمك و وعيك بسلوكك تجاه الامور ، كمان معرفتك للفرق الكبير بين المشاعر و العواطف وقت حدوثه و بعد حدوثها، حتى لو حصل و أتغييروا ، ممكن يغير حاجات كتير في حياتك، في لحظة كنت مفكر أنهم ممكن ميتغيرش شئ في عالمك.

تفتكر مرة كانت فيها مشاعرك مش عواطفك متحكمة أو العكس؟؟

--------------------------------------------------------------------

التجربة للشئ هي اللى هتحدد أذا كان جى شغفك و لا لأ؟؟

الحياة مش النهاية، الحياة هى الرحلة ، الشغف هو الرحلة نفسها مش نهايتها 

Shaymaa Al-Okaily