Passion to business- هل أنا مميز أم لأ؟ 1

هل أنا مميز أم لا؟؟

سؤال بيطرح نفسه علطول، هل انا شاطر و لا لأ؟ هل أنا مميز و لا لأ؟، بعضنا بيعيش و يموت ، و هو منتظر حد يقوله برافو انت شاطر!!، عماليين نفسر اننا ممتازين و اننا شاطرين بمليون تفسير، و دايما عايشين في حلم "أ" أفعل تفضيل، أميز، أحسن، أشطر، أجمل، أفضل.

عايشين عشان نشوف أنفسنا أفضل من غيرنا، لأن دي هو الضمانة الوحيدة ، أننا أتخلقنا عشان سبب، و الحقيقة أنك مميز لوحدك من غير مقارنة مع حد مطلقا ، و مخلوق عشان رسالة هتؤديها، و ترجع تاني عند ربنا يحاسبك علي رسالتك ، هل أديت الرسالة صح؟؟!!، و وصلتها للعنوان المطلوب، هل خلصتها في الوقت المطلوب، هل خلصتها بالشكل المطلوب؟!!

بالمناسبة، الشكل المطلوب منك ، ممكن يكون بس مجرد تمهيد لغيرك ، عشان غيرك يعمله و ينهي اللمسات الأخيرة، الحساب عند الله ، لا يخضع لمقاييس من خلص الواجب الأول كله صح!!، و لا يخضع لنموذج اللي اتعلمنه في مدراسنا، و هو المثال المحلول و الأجابة النموذجية.

لا تشغل بالك مطلقا بالحساب النهائي، لكن اجتهد في ايصال الرسالة ، بإعلي محاولة من الدقة المطلوبة للجهة المطلوبة، طيب و انا هعرف ايه "الرسالة" ازاي، و منين، و هوصلها لمين؟؟ ، كل دي هنعرفه في الجزء التاني من الكتاب، الأهم هو تغيير العقلية و تعلم الحروف الأبجدية لفك شفرة الرسالة.

عشان نفهم موضوع التميز بشكل أوسع، مصنع سامسونج بيصنع كام جهاز سنويا، ملايين، كلهم شبه بعض صح كده؟؟!!، طيب ايه اللي بيخلي جهاز يختلف عن التاني، رغم أن القدرات واحدة ، و الأمكانيات في الجهاز واحدة، هو البرامج المستخدمة فيه، صح كده؟ هو مين هيستخدمه و هيفيده في أيه؟!! ( صح كده؟؟!!) بمعنى تانى السوفت وير اللى موجود جوا الموبيل، هل ليك رأي تاني؟؟

-----------------------------------------------

طيب ليه مقولناش علي شركة سامسونج، مثلا " أيه الشركة دي اللي بتصنع منتجات كتير متشابهة؟؟!!"، عشان صنعت ملايين النسخ من نفس الجهاز ، لأننا مؤمنين أن كل واحد من الأجهزة دي مهما تشابهت في الشكل ، له استخدام خاص به، له برامج بيحبها المستخدم عليه طبقا لطبيعة عمله، كل مستهلك/مستخدم له ما يخصه و يميزه من البرامج اللي ممكن يتم وضعها علي الجهاز، صح كده؟؟!!

 -----------------------------------------------

الفيس بوك فيه كام مشترك ملايين البشر، و رغم كده كل واحد متابع صفحات معينة خاصة به، ممكن يتشابه مع اصحابه في 10 صفحات بيتابعهم كلهم، لكن اللي بيظهر علي صفحته غيرهم، ويظل ان فيه صفحة مختلفة بينهم!، طيب حتي لو تشابهت الصفحات، هل طريقة تفكيرك في نفس المعلومة اللي أنت واصحابك سمعتوه ، هو نفس طريقة تفكيرهم كلهم ( 10 اصحاب)!! ( هل ليك تعليق أخر مختلف؟؟)

-----------------------------------------------

يبقي أذن التميز بصمة وضعها الله سبحانه وتعالي فينا، رغم تشابهنا في كل شئ ، أنت لما أتخلقت، أتخلقت لهدف معين ولرسالة هتنزل الأرض عشان تؤدي الرسالة ، و ترجع تاني (عن طريق الموت) عشان تتحاسب هل أديت الرسالة كما يجب أو لأ؟؟. طبيعة جسمك، طبيعة عقلك، ربنا جعلها بهذا الشكل حتي تتناسب مع رسالتك في الحياة.

أذن منك ملايين النسخ ، لكن السوفت وير اللى موجود فى عقلك و طريقة فهمك و طريقة عرضك للأمور هى اللى هتخليك مميز، و لا تبحث أبدا عن "أ" أميز ، لأنها أصلا مش موجودة.

 وللحديث بقية
 

Shaymaa Al-Okaily