Passion to business- 1التفكير

غير تفكيرك ، تغير حياتك

كان فيه فيديو منتشر علي الواتس و الفيس و كل مكان تقريبا من فترة طويلة ، مفاده، أن لو كل الحروف الأبجدية (A to Z) أخدت أرقام مقابله لها ، زي A=1 & Z=26 ، و بدأنا كل كلمة نحولها لأرقام ، فكلمة  Knowledge معرفة مثلا هتاخد 96% ، و كلمة attitude  هتكسب وتبقي 100%، و كلمة attitude  ممكن نعرفها علي أنها عبارة عن سلوكك و تفكيرك ناحية أي موقف، تفكيرك ناحية الأمر واللي منه بننطلق ناحية تصرفك في الموقف.

ممكن تشوف أكتر عن الفيديو في الرابط دي:

https://www.youtube.com/watch?v=RrdHkYw_7bg

محتاجيين نفهم أن لما مثلا بنفكر في قرار ما تجاه شئ، عقلنا تقريبا بيكون واخد القرار مسبقا،  بناءا علي المخزون السابق من خبراتنا ، و مشاعرنا و عواطفنا، و ما مرينا فيه من لحظة الولادة و ما مر بينا من أحداث سواء كنا واعيين و مدركيين لها أو لأ لحد ما وصلنا لعمرنا الحالي!!.

علي سبيل المثال لا الحصر، لو بنت مش عايزة تشتغل مثلا،  و كانت أم البنت في الصغر كانت بتشتغل ، و كانت مهتمة وقادرة توفق بين البيت و بين الشغل، صراع البنت هنا هيكون هل هتنجح زي أمها و لا لأ؟؟، هل فيه لازمة للشغل ولا لأ؟؟ ، بس هي داخليا واخدة قرار بالشغل مثلا ، لأن النموذج اللي شفته في حياتها كان ناجح ( دي الشئ اللي مش واضح لحد، أنها جوا نفسها واخدة القرار بنسبة قوية جدا، لكن مش معطية لنفسها فرصة تركز مع نفسها) ، لكن اللي واضح لها وللناس كلها من حواليها أنها مترددة.

 دي معناه أن العقل تقريبا بيكون واخد القرار ، و أحنا مشعارفيين.

فيه نقطة كمان، لازم نعرف أن المقولة بتقول "غير فكرة هتغير سلوك"، تغييرك للفكرة عن شئ ، هيغير طريقة نظرتك ، و تعاملك مع الشئ و يغير سلوكك ناحيته. 

رغم أن دي مش سهل بالشكل المكتوب، الإ أنه يستاهل أننا نحاول معه ، و نقتلع فكرتنا القديمة من جذورها ، و نزرع فكرة جديدة حتي تصل للعمق جدا و تمد جذورها مكان الفكرة القديمة، و دي حتي نصل لتغيير سلوكياتنا و تغيير حياتنا، قرارك أنهاردة هو اللي هيغير بكرة بتاعك، الماضي بتاع أمبارح وقراراته هو اللي وصلك للنهاردة اللى أنت عايش فيه.

 يبقي عشان نكون صح، خلينا لما ناخد قرار نسأل نفسنا الأول هل فيه قرار أنا مايل له أكتر من التانى؟؟!!، هي أيه الفكرة اللي كانت مسيطرة وقت اتخاذ القرار؟؟ ، و أيه مشاعري/ عواطفي تجاه الأمر؟؟، و ليه بصيت كده و ليه الزوية دي تحديدا؟؟، و هل فيه زوايا تانية للنظر في الأمر؟؟.

( الموقف الأول) ، افتكر موقف كنت متردد بشأنه؟ ، و ليه أخدت القرار دي، و أيه الفكرة اللي كانت مسيطرة عليك وقت أتخاذ القرار؟؟!!

------------------------------------------------------------------

( الموقف الثانى) ، افتكر موقف كنت متردد بشأنه؟ ، و ليه أخدت القرار دي، و أيه الفكرة اللي كانت مسيطرة عليك وقت أتخاذ القرار؟؟!!

------------------------------------------------------------------

 Shaymaa Al-Okaily